ပထဝီနိုင်ငံရေးကျရှုံးမှု၏အဖြေ ကျွန်သက်ရှည်

- November 01, 2021

မြန်မာ့ ပင်လယ်ထွက်ပေါက်မှာ စစ်တွေ ၊ ကျောက်ဖြူ ၊ သံတွဲ ၊ ပုသိမ် ၊ ရန်ကုန် ၊ မော်လမြိုင် ၊ ထားဝယ် ၊ မြိတ် ၊ကော့သောင်း ဆိုပြီး ဆိပ်ကမ်းတွေတည်ဆောက်ထား ရှိပါတယ် ။

အဲ့ဒီထဲကမှ ကျောက်ဖြူ ၊မော်လမြိုင်၊ ထားဝယ် ဆိပ်ကမ်းတွေကတော့ ဆောက်လက်စ အဖြစ်ပဲ ရှိပါသေးတယ် ။

ဆိပ်ကမ်းတွေ အားလုံးထဲကမှ လက်ရှိအနေအထားအရ မဟာဗျူဟာအကျဆုံး ဆိပ်ကမ်းတွေကတော့ ကျောက်ဖြူ ၊ သီလဝါ ၊မော်လမြိုင် ၊ ထားဝယ် ရေနက်ဆိပ်ကမ်းတို့ပဲ ဖြစ်ပါတယ် ။

တရုတ်နိုင်ငံဖက်ကနေဖော်ဆောင်လျက်ရှိတဲ့ ခေတ်သစ်ပိုးလမ်းမ BRI /OBOR လမ်းကြောင်းဖြစ်သော ကျောက်ဖြူ-မန္တလေး-ကူမင် လမ်းကြောင်းကလည်း 👉မန္တလေး👈က ဖြတ်ပါတယ် ။

ဘင်္ဂလားဒေ့ရှ် ၊တရုတ်၊အိန္ဒိယ၊မြန်မာ့ စီးပွားရေးစင်္ကြန်လမ်းBCIM- EC ကလည်း 👉 မန္တလေး👈က ဖြတ်ပါတယ် ။

ဧရာဝတီမြစ်ဝှမ်းစီမံကိန်းဖြစ်တဲ့ ဧရာဝတီမြစ်ကြောင်းတစ်လျောက်ကနေ ကုန်သွယ်မဲ့လမ်းကြောင်း ရန်ကုန်-မန္တလေး-မြစ်ကြီးနား-ကူမင်ကလည်း 👉မန္တလေး👈က ဖြတ်ပါတယ် ။

ဒါကြောင့် ၎င်းကုန်သွယ်ရေးလမ်းကြောင်းတို့၏ ဆုံချက်ဖြစ်တဲ့ 👉မန္တလေးမြို့👈အနီးမှာ " မြို့သာစီမံကိန်း ၊ အမရပူရစီမံကိန်း"တို့ဟာ မြန်မာ- တရုတ် စီးပွားရေးစင်္ကြန်လမ်း CMEC -EC အတွက် တည်ဆောက်ဖို့ တရုတ်ဖက်က ရည်စူးတာဖြစ်ပါတယ် ။

နောက်တစ်ခုက ရန်ကုန်မြို့သစ်စီမံကိန်းရှိမယ် ၊ မြစ်ကြီးနားစီးပွားရေးဇုံ စီမံကိန်းတွေ ရှိမယ်ပေါ့ ။

သံလွင်မြစ်အရှေ့ခြမ်းစီမံကိန်းတွေကတော့ ထားဝယ်ရေနက်ဆိပ်ကမ်း - ကူမင် ကူသန်းလမ်းကြောင်းနဲ့ ချိတ်ဖို့ ရည်ရွယ်ပါတယ် ။

အချက်အခြာကျတဲ့ ကျောက်ဖြူ ၊ ရန်ကုန် နှင့် မန္တလေးကို ချုပ်ကိုင်ထားနိုင်ရင် မြန်မာ့စီးပွားရေးတက်ခြင်းကျခြင်းတွေကိုပါ ထိန်းချုပ်လို့ ရနေနိုင်ပါပြီ။

မြန်မာ့နိုင်ငံရဲ့ ပထဝီနိုင်ငံရေး အချက်အခြာကျတဲ့နေရာတွေကို ဆုပ်ကိုင်ထားပြီး မြန်မာ့စီးပွားရေးကိုပါ ချုပ်ကိုင်ထားလို့ရတဲ့ အနေအထားအခင်းအကျင်းဆိုတာ မြင်ယုံနဲ့ သိသာပါတယ် ။

တနည်း မြန်မာ့ပထဝီနိုင်ငံရေးအချက်အခြာကျတဲ့နေရာကို ခြေကုပ်ယူထားပြီး စီးပွားရေးကို ချုပ်ကိုင်ထားနိုင်ရင် ကျည်တချက်ဖောက်စရာမလိုဘဲ မြန်မာပြည်ကို သိမ်းပိုက်နိုင်ခြင်းပါပဲ ။

မြန်မာနိုင်ငံအပေါ်ကို စီးပိုးဖို့ ချမှတ်ထားတဲ့ တရုတ်ရဲ့ Plan A , B , C ဆိုရင်လည်း မမှားပါဘူး။လမ်းကြောင်းတစ်ခုမရရင် နောက်လမ်းကြောင်းတစ်ခုနဲ့သွားမဲ့ အကြံအစည်မျိုးပါ ။

အဆုံးစွန်ဆုံး တရုတ်ဟာ ကျောက်ဖြူကို လက်လွှတ်ရသည့်တိုင်အောင် ၊ ဧရာဝတီမြစ်ဝှမ်းစီမံကိန်း အကောင်အထည်ဖော်ခွင့်မရသည့်တိုင်အောင် ၊ ၎င်းတို့နှင့်ဆက်စပ်သော မြို့ပြစီမံကိန်းတွေ အကောင်အထည်ဖော်ခွင့်မရသည့်တိုင်အောင် ထားဝယ်ရေနက်ဆိပ်ကမ်း မှ ကူမင်ကို ကုန်သွယ်လို့ ရပါတယ် ။

ဒါဆို ဘာလို့ တရုတ်ဟာ ကျောက်ဖြူတို့ ၊ ဧရာဝတီမြစ်ဝှမ်းစီမံကိန်းတို့ ၊ ၎င်းတို့နှင့်ဆက်စပ်သော မြို့ပြစီမံကိန်းတွေအပေါ်မှာ အသည်းအသန်ဖြစ်နေရသလဲဆိုတာ တချက်တွေးကြည့်ရအောင် ။

မလက္ကာ ရေလက်ကြားဟာလည်း စစ်ရေးအနေတင်းမာရင် ပိတ်ဆို့သွားနိုင်သလို လက်ရှိသွယ်တန်းထားတဲ့ ကျောက်ဖြူ- ကူမင် လောင်စာပိုက်လိုင်းဟာလည်း အနေအထားတစ်ခု တင်းမာရင် ပိတ်ဆို့သွားနိုင်တာလည်း တရုတ်နိုင်ငံက တွက်ချက်ပြီးသားဖြစ်မှာပါ ။

ဒါကြောင့် မြန်မာနိုင်ငံရဲ့ ပထဝီနိုင်ငံရေးအချက်အခြာကျတဲ့နေရာတွေကို ခြေကုပ်ယူထားနိုင်ပြီး မြန်မာ့စီးပွားရေးအပေါ်မှာ ရာခိုင်နှုန်းအတော်များများလွှမ်းမိုးချုပ်ကိုင်ထားနိုင်ပါမှ အိန္ဒိယသမုဒ္ဒရာရေပိုင်နက် စိုးမိုးရေးကို ထိန်းချုပ်ထားနိုင်မှာဖြစ်တဲ့အတွက်ကြောင့်ပဲ ဖြစ်ပါတယ် ။