🇺🇸 နိုင်ငံရေးလုပ်ကြံမှုကြီး 🇺🇸

Trump နေထိုင်တဲ့ မာ-အာ-လာဂို (Mar-A-Lago) အိမ်ကို FBI အေးဂျင့် အမြောက်အမြားက ယနေ့ ဝင်ရောက်စီးနင်းလိုက်တယ်လို့သိရပါတယ်။

ဘာကြောင့်စီးနင်းတယ်ဆိုတာ တရားရေးဌာန နှင့် FBI ကထုတ်မပြောသေးပါဘူး။ နိုင်ငံတော်အတွက် လျှို့ဝှက်ထားရမယ့်စာရွက်စာတမ်းတွေကို Trump အိမ်ဖြူတော်ကထွက်ခွါချိန်မှာ ယူဆောင်သွားခဲ့တယ်ဆိုတဲ့ စွပ်စွဲပြောဆိုမှုတွေတော့ ရှိပါတယ်။

သမ္မတဟောင်းတစ်ယောက်ဖြစ်သလို 2024 ရွေးကောက်ပွဲမှာ ပြန်လည်အရွေးခံရနိုင်တဲ့ Trump အပေါ်အခုလို ဆောင်ရွက်တာဟာ အကျင့်ပျက်နေတဲ့ တတိယနိုင်ငံတွေမှာသာ ဖြစ်ပေါ်လေ့ရှိတယ်လို့ Trump ကပြောလိုက်ပါတယ်။ သူ့အိမ်ရှိ အခန်းများမှ စာရွက်စာတမ်းများကို FBI က ယူဆောင်သွားတယ်လို့ဆိုပါတယ်။

Biden ရဲ့သား Hunter Biden ရဲ့ laptop ထဲမှာတွေ့ရတဲ့ အထောက်အထားတွေအရ Biden တို့မိသားစုတွေ အကျင့်ပျက် ခြစားထားတာ သိကြပေမယ့် နှစ်နှစ်ကျော်ကြာသည်အထိ စုံစမ်းစစ်ဆေး အရေးယူတာမရှိသေးပါဘူး။ ဒါကိုကြည့်ခြင်းအားဖြင့် တရားရေးဌာန နှင့် FBI ကအကြီးဆုံးလူတွေဟာ ဒီမိုကရက်ဘက်တော်သားတွေဆိုတာ ထင်ရှားနေပါတယ်။ 

2024 ရွေးကောက်ပွဲမှာ Trump ဝင်ပြိုင်လို့မရအောင် ဒီမိုကရက်တွေ တနည်းမဟုတ်တနည်း ကြံစည်ကြလိမ့်မယ်ဆိုတာ တွက်ဆလို့ရနေပါတယ်။ အခုလာမယ့်နိုဝင်ဘာလမှာလည်း Mid term election ရှိပါတယ်။ 

Thein Lwin

၂၀၂၂ ခုနှစ် ၊ သြဂုတ်( ၈ )ရက်

https://www.foxnews.com/politics/trump-says-mar-a-lago-home-florida-siege-fbi-agents

နောက်ဆက်တွဲသတင်းအချက်အလက်များ 👇

မနေ့က ထရမ့်ရဲ့ ဖလော်ရီဒါက မာရာလေဂိုအိမ်ကြီးကို အင်အားသုံး ရှောင်တခင် ဝင်ရှာခဲ့တာဟာ ၉နာရီကျော် ကြာမြင့်ပြီး သမ္မတဟောင်းထရမ့်ရဲ့ သီးသန့်ရုံးခန်းထဲကို ဝင်ရှာခါ မီးခံသေတ္တာကြီးကို ချိုးဖျက်ဖွင့်ဖောက်ပြီး အံဆွဲတွေ အကုန်ဖွင့်ထုတ်ပြီး နာရီပေါင်းများစွာ ရှာဖွေခဲ့တယ်လို့ သိရပါတယ်။ ဒါ့အပြင် ထရမ့်တို့ အိပ်ခန်းက မီလာနီယာရဲ့ အဝတ်အစားဘီရိုတွေပါမချန် စစ်စစ်ပေါက်ပေါက် ရှာဖွေခဲ့ပါသေးတယ်။ 

ရှာဖွေဝရမ်းမှာ ပါတာက သမ္မတဖြစ်စဥ်က မှတ်တမ်းတွေနဲ့ လျို့ဝှက် အချက်အလက်တွေကို အဲဒီစံအိမ်မှာ သိမ်းထားတယ်ဆိုတာကို သက်သေပြချင်လို့ ဖြစ်ပါတယ်။ အဲဒါဆိုရင် သမ္မတကတော်ရဲ့ အဝတ်ဘီရိုတွေကို စစ်စစ်ပေါက်ပေါက်လိုက်ကြည့်တာက သက်သက် စိတ်အနှောက်အယှက် ဖြစ်အောင် လုပ်တာပါပဲ။ မျက်မြင်သက်သေတွေအဆိုအရလည်း အက်ဖ်ဘီအိုင် အေးဂျင့်တွေဟာ မောက်မာကြတယ်လို့ ဆိုပါတယ်။ 

အက်ဖ်ဘီအိုင်ယူသွားတဲ့ ပုံး၁၅လုံးကို အစိုးရပိုင်အဖြစ် သိမ်းဆည်းလိုက်ပြီဖြစ်ပြီး တခြား ဘာတွေယူသွားသေးလဲဆိုတာကိုတော့ အက်ဖ်ဘီအိုင်က စာရင်းထုတ်ပြန်ပေးခြင်း မရှိတဲ့အတွက် မသိရပါဘူး။ ဒီကနေ့မှာတော့ ထရမ့်က နယူးယောက်ကအိမ်ကို ရောက်လာပြီဖြစ်ပါတယ်။ 

သိမ်းသွားတဲ့ စာရွက်စာတမ်းတွေထဲမှာ သမ္မတဖြစ်စဥ်ကာလတလျောက်လုံးက စာရွက်စာတမ်းတွေ ပါဝင်ပြီး အဲဒီထဲမှာ အရင်သမ္မတ အိုဘားမားက သမ္မတသစ်ထရမ့်ကို အစဥ်အလာအရ ပေးရတဲ့စာ၊ မ/ကရယ ကင်မ်ကနေ ရေးတဲ့စာနဲ့ တခြား ကမ္ဘာ့ခေါင်းဆောင်တွေကနေ ရေးတဲ့စာတွေ ပါဝင်ပါတယ်။ အီဗန်ကော်ကိုရန်ဦးဆောင်တဲ့ ထရမ့်ရှေ့နေအဖွဲ့က ဖက်ဒရယ်အရာရှိတွေနဲ့ပေါင်းပြီး အဆိုပါသိမ်းဆည်းစာရွက်စာတမ်းတွေကို အမျိုးသားမှတ်တမ်းတိုက်ကို ပြန်ပို့ပေးစေဖို့ ကြိုးစားနေပါတယ်။ 

မေလတုန်းကလည်း မာရာလေဂိုအိမ်ကြီးရဲ့ မြေအောက်ထပ်က ပစ္စည်းထားတဲ့အခန်းကို အက်ဖ်ဘီအိုင်က နာရီပေါင်းများစွာ ရှာဖို့ ရှေ့နေကော်ကိုရန်က ခွင့်ပြုပေးခဲ့ပါတယ်။ အဲဒီနောက်ပိုင်းထဲက ထရမ့်မိသားစုက နယူးဂျာစီ ဘက်မင်စတာမြို့က ဂေါက်ကွင်းမှာရှိတဲ့ အိမ်မှာ ပြောင်းနေခဲ့ပါတယ်။ အဲဒါကြောင့် မနေ့က အက်ဖ်ဘီအိုင်စီးနင်းမှုမှာ ဝန်ထမ်းအနည်းငယ်ပဲ ရှိနေခဲ့တာပါ။ ဧက ၂၀ကျယ်တဲ့ ခြံအဝမှာတော့ သမ္မတဟောင်းတွေကို ပေးတဲ့ ထုံးစံအတိုင်း လက်နက်ကိုင် စီးကရက်ဆားဗစ်တွေ နေရာယူထားပါတယ်။ 

အက်ဖ်ဘီအိုင်က ထရမ့်တို့ကို အကြောင်းမကြားပဲ ဝင်တာဖြစ်ပေမယ့် သူတို့ဝင်ခွင့်ရဖို့ စီးကရက်ဆားဗစ်ကို ကြိုအသိမပေးပဲ မဖြစ်နိုင်ပါဘူးလို့ အငြိမ်းစား စီးကရက်ဆားဗစ်အရာရှိကြီး တဦးက ဆိုပါတယ်။ ထရမ့်ရှေ့နေတွေကတော့ ကြိုမသိရတဲ့အတွက် ဝင်ပြီး ၁နာရီလောက်နေမှ ရောက်လာကြတာပါ။ ရှေ့နေတွေ ရောက်လာပြီးတော့ သူတို့ညွှန်ကြားမှုနဲ့ ဝန်ထမ်းတွေက အက်ဖ်ဘီအိုင်တွေအတွက် တံခါးတွေ လိုက်ဖွင့်ပေးခဲ့ပါတယ်။ ရှေ့နေတွေကို လိုက်မကြည့်ဖို့အပြင် အထဲမဝင်ဖို့ပါ တားမြစ်ထားတဲ့အတွက် နေပူကျဲကျဲထဲမှာ စောင့်နေခဲ့ရပြီး ဘာတွေယူသွားတယ် ဆိုတာကိုလည်း အတိအကျ မသိရဘူးလို့ ဆိုပါတယ်။ အက်ဖ်ဘီအိုင်အေးဂျင့်တွေက လုံခြုံရေးကင်မရာတွေကိုပါ ပိတ်ခိုင်းပေမယ့် ရှေ့နေတွေက ပိတ်ပေးဖို့ ငြင်းဆိုခဲ့ပါတယ်။

ရှာဖွေဝရမ်းကို လက်မှတ်ထိုးပေးလိုက်တဲ့ တရားသူကြီး ဘရုစ်ရိန်းဟတ်က ၂၀၀၈ခုနှစ် မတိုင်ခင်က အစိုးရရှေ့နေ လုပ်ခဲ့သူဖြစ်ပြီး ၂၀၀၈ကစလို့ ကိုယ်ပိုင်ရှေ့နေလုပ်ငန်းစတင်ခဲ့ပါတယ်။ ၂၀၁၁မှာတော့ ကလေးလိင်အမြတ်ထုတ်သူ ဂျက်ဖရေအက်ပ်စတိန်းရဲ့ ဝန်ထမ်းတွေအတွက် ရှေ့နေလိုက်ပေးဖို့ ရိန်းဟတ်ကို အက်ပ်စတိန်းက ငှားရမ်းခဲ့ပါတယ်။ အက်ပ်စတိန်းကို ဖမ်းဆီးခဲ့တဲ့ ၂၀၁၉ခုနှစ်တုန်းက အစိုးရရှေ့နေရုံးနဲ့ အက်ပ်စတိန်းရဲ့ရှေ့နေအဖွဲ့တို့ကြား သံသယဖြစ်ဖွယ် ပူးပေါင်းဆောင်ရွက်မှုတွေ တွေ့ခဲ့ရလို့ လူတွေ အပြင်းအထန်ဝေဖန်တာ ခံခဲ့ရပါတယ်။ 

ရိန်းဟတ်လိုက်ပေးခဲ့တဲ့ အက်ပ်စတိန်းဝန်ထမ်းတွေထဲမှာ လေယာဥ်မောင်းနှစ်ဦး၊ အချိန်ဇယားရေးဆွဲ စီစဥ်ပေးသူ ဆာရာကဲလန်နဲ့ အက်ပ်စတိန်းရဲ့ ယူဂိုဆလပ်လိင်ကျွန်လို့ သိထားကြတဲ့ နာဒီယာမာစင်ကိုဗာ တို့ ပါဝင်ပါတယ်။ အဲဒီအချိန်က အက်ပ်စတိန်းဖက်က လိုက်ပေးတဲ့ ခေါင်းဆောင်ရှေ့နေ ဂျက်ခ်ဂိုလ်းဘာဂါရဲ့ ရုံးလိပ်စာနဲ့ ဘရုစ်ရိန်းဟတ် စတင်ဖွင့်လှစ်လိုက်တဲ့ သူ့ရုံးခန်းဆိုတာက အတူတူဖြစ်နေခဲ့တာကို တွေ့ရပါတယ်။ 

၂၀၀၈ခုနှစ်မှာ ပြုလုပ်ခဲ့တဲ့ ဖြောင့်ချက်အရ အဲဒီဝန်ထမ်းတွေဟာ အက်ပ်စတိန်းနဲ့အတူ အမှုတွဲဖြစ်မသွားပဲ အစိုးရရှေ့နေနဲ့ အပေးအယူလုပ်ခဲ့ပါတယ်။ အပေးအယူဆိုပေမယ့် အက်ပ်စတိန်းအမှုအတွက် အရေးပါတဲ့ သက်သေခံတွေတော့ ဘာမှရလိုက်ပုံ မပေါ်ပါဘူး။ အက်ပ်စတိန်းရှေ့နေနဲ့ သူ့ဝန်ထမ်းတွေရဲ့ရှေ့နေက ရုံးခန်းလိပ်စာတခုတည်းဆိုတော့ အကျိုးစီးပွားချင်း လွတ်လွတ်ကင်းကင်း ဖြစ်မနေတာ ထင်ရှားနေလျက်နဲ့ အမှုကနေ နောက်မဆုတ်ပဲ ဆက်လိုက်ခဲ့တာက ရိန်းဟတ်တို့ရဲ့ ကိုယ်ကျင့်တရား သိက္ခာသမာဓိကို ပြသနေတာပါပဲ။ 

၂၀၁၁တုန်းက ရိန်းဟတ်ကျမ်းကျိန်ပြီး အစစ်ခံခဲ့တာမှာတော့ သူက အက်ပ်စတိန်းအမှုကို လိုက်ခဲ့တဲ့အဖွဲ့မှာ မပါဝင်တဲ့အတွက် အဲဒီအမှုနဲ့ပတ်သက်တဲ့ မည်သည့်လျို့ဝှက်ချက်ကိုမှ သိရှိခြင်းမရှိကြောင်း ကျိန်ဆိုထားပါတယ်။ နောက် ၂နှစ်အကြာမှာ ယူအက်စ်အတိုနေရုံးက  သူ့အရင်အကြီးအကဲတွေရေးသားခဲ့တာမှာတော့ ရိန်းဟတ်ဟာ လက်ထောက်ဒီအေဘဝတုန်းက လူထုကို ချမပြထားတဲ့ အက်ပ်စတိန်းအကြောင်း လျို့ဝှက်ချက်တွေကို မသိခဲ့ဘူးဆိုတာ မဖြစ်နိုင်ဘူးလို့ ဆိုကြပါတယ်။ အက်ပ်စတိန်းတို့နဲ့ ပတ်သက်နေသူဆိုတော့ လက်မရွံ့ဖြစ်မှာ မလွဲပါဘူး။ ရိန်းဟတ်က အိုဘားမားနဲ့ ဂျက်ဖ်ဘုရှ်တို့ကိုကို ငွေလှူထားဖူးသူလည်း ဖြစ်ပါတယ်။

အခုလိုစစ်တာ စစ်ဆေးရှာဖွေတာမျိုးက ပြည်တွင်းအခွန်နဲ့ အက်ဖ်ဘီအိုင်က ၂၀၁၅ထဲက တစိုက်မတ်မတ် လုပ်လာခဲ့တာပါ။ မပြောမဆိုနဲ့ နေအိမ်ကိုလာရှာတာတခုပဲ ပိုထူးပါတယ်။ အဲဒီကထဲက သူတို့စွပ်စွဲသမျှ ဘာအထောက်အထားမှ မရ၊ မပြနိုင်ခဲ့ပေမယ့် အရှာခံရတာတခုနဲ့တင် တဖက်ပါတီက နိုင်ငံရေးအမြတ် ထုတ်နိုင်နေပြီ ဖြစ်ပါတယ်။ ဒီမိုကရက်တွေ တချိန်လုံး စွပ်စွဲနေသလို ထရမ့်က ဘာကြီး ညာကြီးဆိုတဲ့ နာမည်ဖျက်ဇတ်လမ်းတွေကို မီဒီယာအားနဲ့ ဝိုင်းဖိလိုက်ရင် ကိုယ်ပိုင်ခေါင်းမသုံးချင်သူတွေ၊ အမုန်းတွေနဲ့ နင်မဟုတ် နင့်အဖေပဲဆိုတဲ့သူမျိုးတွေ ဆီက မဲရနိုင်ခြေ တက်လာမယ်လို့ မျှော်လင့်နေပုံ ရပါတယ်။

ထရမ့်အစိုးရလက်ထက်မှာ အမျိုးသားထောက်လှမ်းရေးအဖွဲ့ ယာယီဒါရိုက်တာလုပ်ခဲ့တဲ့ ရစ်ချတ်ဂရီနဲလ်က တတိယကမ္ဘာနိုင်ငံတွေက အာဏာရှင်တွေသာ သူတို့ရဲ့ နိုင်ငံရေးရန်သူတွေကို အခုလို တရား/မတရားနည်းမျိုးစုံနဲ့ အပြစ်ရှာ ထောင်ချောက်ဆင်ကြကြောင်း၊ ဘိုင်ဒန်က သူ့ရဲ့ နိုင်ငံရေးရည်ရွယ်ချက်တွေအတွက် အစိုးရယန္တယားကို အသုံးချနေကြောင်း၊ အဲဒါဟာ အလွန်ဆိုးရွားပြီး မဖြစ်သင့်တာတခုကို အစ/အလျဥ်လုပ်ပေးလိုက်သလို ဖြစ်နေကြောင်း တွိသွားခဲ့ပါတယ်။

ဂရီနဲလ်ရဲ့ တွိအပေါ် နယူးယောက်ရဲကော်မစ်ရှင်နာဟောင်းတဦးဖြစ်တဲ့ ဘာနတ်ကီရစ်က အခုလောက် အကြီးစား နှောက်ယှက်မှုမျိုး လုပ်တာတောင် ထရမ့်က ၂၀၂၄မှာ ဝင်ပြိုင်ဖို့ နောက်မဆုတ်ဘူးဆိုရင် နောက်တဆင့်က လုပ်ကြံဖို့ပဲ ဖြစ်လိမ့်မယ်လို့ သူ့အတွေ့အကြုံကို ကိုးကားပြီး သတိပေးလိုက်ပါတယ်။ စီးကရက်ဆားဗစ်က သူ့အလုပ်ဖြစ်တဲ့ ထရမ့်ပိုင်နက်ကို ကာကွယ်ပေးရမယ့်အစား ဘောင်ကျော်ပြီး အက်ဖ်ဘီအိုင်ကို ဝင်ခွင့်ပြုခဲ့တာက ဘာနတ်ကီရစ်ရဲ့ ခန့်မှန်းချက်ကို ပိုလေးနက်အောင် ပြနေသလိုပါပဲ။ အာဏာအတွက် မလုပ်ရဲတာမရှိတဲ့ ကြောင်ချေးတွေ မြန်မာပြည်မှာတင် ရှိတာမဟုတ်ဘူးဆိုတာ သိစေချင်ပါတယ်။ 

ထရမ့်ရဲ့ မာရာလေဂိုအိမ်ကို အက်ဖ်ဘီအိုင်တွေ ဝင်စီးတာနဲ့ ပတ်သက်ပြီး ပြည်သူတွေကြား အုတ်အော်သောင်းနင်းဖြစ်သွားတာကြောင့် ဘိုင်ဒန်နဲ့ ဘဒအစိုးရရဲ့ ရှေ့နေချုပ် မဲရစ်ဂါလန်တို့ကို မေးမြန်းဖို့ လိုက်ရှာခဲ့ကြပါတယ်။ ဘိုင်ဒန်က ဟန်းတားကိုပါခေါ်ပြီး ဗကေးရှင်းထွက်သွားလို့ မေးလို့မရသလို မဲရစ်ဂါလန်ကလည်း ဘယ်ရောက်နေမှန်း စုံစမ်းလို့ မရဘူးဖြစ်နေပါတယ်။ ဘိုင်ဒန်မိသားစုက တောင်ကာရိုလိုင်းနားက ဒီမိုကရက်တွေရဲ့ အမာခံအလှူရှင် မာရီယာအော်လွင်ရဲ့ သန်း၂၀တန် ပင်လယ်ကမ်းခြေက အိမ်ကြီးမှာ အခမဲ့ သွားရောက်ဇိမ်ခံနေပါတယ်။ 

(ဘိုင်ဒန်အိမ်ဖြူစရောက်ကတည်းက အရင်သမ္မတတွေလို အစိုးရအပန်းဖြေစခန်းတွေကို သွားလေ့မရှိပဲ ဒီလဝဲကမ်းခြေက သူ့အိမ်(သို့) အခုလို လူနိုင်သူဌေးတွေရဲ့ အိမ်တွေမှာပဲ အခမဲ့ လှည့်နားနေတာပါ။ ဟန်းတာက အမြဲပါသွားတာဆိုတော့ ဖြစ်နိုင်တာတခုက လက်ဝါးရိုက်တာတွေ ပွဲစားလုပ်တွေ့ပေးတာတွေကို လူမသိစေချင်လို့ ဖြစ်ပါလိမ့်မယ်။) 

ဂါလန်ကတော့ လူတွေလိုက်ကြလွန်းလို့ ကနေ့မှ စာထုတ်ပြီး ထရမ့်အိမ်ကို စီးနင်းရှာဖွေဖို့ သူခွင့်ပြုပေးခဲ့တာပါလို့ ဝန်ခံပါတယ်။ လက်မှတ်ထိုးပေးတဲ့ ကောင်တီမဂျစ်စထြိတ်ရိန်းဟတ်ရော ဂါလန်ရောက ဝရမ်းနဲ့ သိမ်းဆည်းလာတဲ့ ပစ္စည်းတွေကို ထရမ့်ရှေ့နေတွေက မကန့်ကွက်ဘူးဆိုရင် အများပြည်သူကို ချပြဖို့ တရားသူကြီးကို တိုက်တွန်းနေကြပါတယ်။ အရင်သမ္မတတွေလို ကင်းလွတ်ခွင့်လည်းမရ၊ ဘာတွေယူသွားမှန်းမသိတော့ ချပြဖို့သဘောတူပြန်ရင်လည်း တကယ်တွေ့ခဲ့တာမဟုတ်တာတွေ၊ ပုဂ္ဂိုလ်ရေးကိစ္စတွေ ပါနေရင် အခက်၊ မချပြပြန်တော့လည်း သွားပုတ်လေလွင့် ပြောကြမှာဆိုတော့ ဆုံးဖြတ်ဖို့ ခက်ခဲတဲ့ ကိစ္စတခုဖြစ်နေတာပါ။ 

အခုလို စစ်ရတဲ့ အကြောင်းရင်းလို့ ဆိုတဲ့တစ်ခုကတော့ နေရှင်နယ်အာခိုက်ဖ် အမျိုးသားမှတ်တမ်းရုံးက ဒါရိုက်တာက သမ္မတထရမ့် အိမ်ဖြူကဆင်းသွားတဲ့အချိန်မှာ ပုံးတွေ ရဟတ်ယာဥ်ပေါ်တင်သွားတာ တီဗီထဲကနေ တွေ့လိုက်တော့ ဘာတွေယူသွားတာလဲလို့ သံသယဖြစ်လို့ပါလို့ ဆိုပါတယ်။ နိုင်ငံတော် လုံခြုံရေးနဲ့ဆိုင်တဲ့ ထိပ်တန်းလျို့ဝှက်တွေကို ပရင့်အောက်တွေထုတ်ပြီး အများပြည်သူကို ထုတ်လွှင့်ပြသနေတဲ့ တီဗီရှေ့မှာ ပုံးတွေနဲ့ သယ်သွားတာကို ခိုးထုတ်သွားတာလို့ထင်တဲ့ ဦးနှောက်က “အံ့မခန်း”ပါ။ နည်းပညာ ဒီလောက်ထွန်းကားနေတဲ့ခေတ်မှာ ပရင့်အောက်ထုတ်ပြီး လျို့ဝှက်ချက်တွေ သယ်သွားတယ်လို့ တွေးနိုင်တဲ့ အင်မတန်မှ စူးရောက်လှတဲ့ ဦးနှောက်တွေ ရာထူးကြီးတွေရနေတာက မအလတို့ သွက်သွက်ခါတို့နဲ့များ အမျိုးတော်နေသလားပါပဲ။ 

အဲဒီပုံးတွေအကြောင်းကို အဲရစ်ထရမ့်က ရှင်းပြတာမှာ သူ့ဖခင်က အင်မတန်စနစ်ဇယားရှိတဲ့သူဖြစ်ပြီး အမြဲတန်း လုပ်သမျှ၊ ကြုံသမျှ ပုဂ္ဂိုလ်ရေးအမှတ်တရတွေကို သိမ်းဆည်းတတ်ကြောင်း၊ ပြီးခဲ့တဲ့လက သူ့မိခင်ရဲ့ ဈာပနမှာလည်း သူတို့စတွေ့စဥ်ကနဲ့ လက်ထပ်ပေါင်းသင်းနေစဥ်ကာလတလျောက်လုံးက အမှတ်တရ စာလေးတွေ၊ ပုံလေးတွေ၊ ကဒ်ကလေး၊ အမှတ်တရလေးတွေကို ပြန်ယူလာပြီး ပြသခဲ့တယ်လို့ ဆိုပါတယ်။ တစ်ခု သိထားဖို့က သမ္မတထရမ့်က အသက် ၇၀ကျော်ဆိုတော့ ဒီဖက်ခေတ် လူလတ်ပိုင်းတွေနဲ့ လူငယ်တွေကြား လုပ်လေ့သိပ်မရှိတော့တဲ့ ဟိုတုန်းက အကျင့်လေးတွေဖြစ်တဲ့ စာလေးတွေ သိမ်းထားတာမျိုး၊ အမှတ်တရလေးတွေ သတိတရ မှတ်တမ်းတင် သိမ်းဆည်းတာမျိုး လုပ်လေ့ရှိသေးတယ်ဆိုတာပါ။ 

သမ္မတရာထူးနဲ့ဆိုင်တဲ့ စာရွက်စာတမ်းတွေ ယူသွားတာကို ခုမှ အမှုထလုပ်ရအောင် အိမ်ဖြူက ထွက်သွားတာပဲ တစ်နှစ်ခွဲကျော်နေပြီဖြစ်သလို ဒီကိစ္စနဲ့ ပတ်သက်ပြီး အရင်လာစစ်ခဲ့တဲ့ အကြိမ်တုန်းကလည်း ထရမ့်ကိုယ်တိုင် မြေအောက် စတိုခန်းထဲထိ သွားပြီး အေးအေးဆေးဆေးစစ်၊ မင်းတို့လိုတာရှိလဲပြောလို့တောင် သွားနှုတ်ဆက်ခဲ့ပါသေးတယ်။ ပြောချင်တာက ဘယ်ဌာနက စစ်ချင်စစ်ချင် ပူးပေါင်းဆောင်ရွက်လိုက်လျောနေပါလျက်နဲ့ ကမ်းတက်လာတာ ဘောင်ကျော်လာတာကို ထင်ရှားစေချင်တာပါ။ 

အက်ဖ်ဘီအိုင်က ဘာဆင်ခြေပေးသလဲဆိုတော့ မာရာလေဂိုအိမ်ကြီးထဲမှာ ငါတို့လူရှိတယ်၊ အဲဒီလူက သတင်းပေးလို့ ငါတို့လာရတာလို့ ဆိုပါတယ်။ မာရာလေဂိုအိမ်ကြီး ခြံကြီးက အကြီးကြီးဆိုပေမယ့် အဲဒီဝင်းက ပွဲတွေ ပါတီတွေ လုပ်ဖို့ ငှားလို့ရတဲ့ ကန်းထရီးကလပ်ဘ်လုပ်ထားတာပါ။ သူတို့မိသားစုသီးသန့်နေတာက ပေ ၃၀၀၀ပဲကျယ်တဲ့ သီးသန့်နေရာပါ။ အဲဒီနေရာကို အေးဂျင့် ၄၈ဦး ဝင်ရှာတာ၊ စာရွက်စာတမ်းတွေက မြေအောက် စတိုခန်းမှာ တွေ့ပြီးဖြစ်ပေမယ့် ထရမ့်အိပ်ခန်းရော၊ ရုံးခန်းရော၊ မီလာနီယာအဝတ်ဘီရိုရော မီးခံသေတ္တာရောကို မနက်၉နာရီကနေ ညနေ ၆နာရီခွဲအထိ ရှာနေကြတာ သွေးရိုးသားရိုးတော့ မဖြစ်နိုင်ပါဘူး။ 

ဂါလန်က ထရမ့်ရှေ့နေတွေမှာ ရှာတာကို ကြည့်ခွင့်ရှိတယ်လို့ ဆိုပေမယ့် လာတာကြိုမပြောခဲ့တော့ တနာရီလောက်ကြာမှ ရောက်ခဲ့ကြတဲ့အပြင် တကယ်တမ်းမှာ ဝင်းထဲကိုတောင် ပေးမဝင်ခဲ့ကြပါဘူး။ မိသားစုနဲ့ နီးစပ်သူတဦးက အသံဖမ်းကိရိယာတွေ တပ်ကောင်းတပ်ခဲ့နိုင်တယ်လို့ ခန့်မှန်းနေပါတယ်။ ၂၀၁၅တုန်းကတောင် ဟူစိန်အို့အမိန့်နဲ့ ဖုံးတွေဖြတ်နားထောင်သေးတာပဲလေ။ ကိုယ်ကျင့်သိက္ခာ တပြားသားမှ မရှိသူတွေအတွက် မလုပ်ဝံ့တာလည်း ရှိအံ့မထင်ပါဘူး။

အခုလို ဝင်စီးတဲ့ကိစ္စနဲ့ ပတ်သက်ပြီး ၂၀၁၆တုန်းက ကလင်တန်ကမ်ပိန်းရှေ့နေနဲ့ ရုရှားကိုလူးရှင်းလိမ်လည်မှုမှာ အဓိက လှုပ်ရှားခဲ့တဲ့ ဥပဒေအဖွဲ့ထဲက တဦးလည်းဖြစ်တဲ့ မာခ်အဲလီယားစ်က ဒီလိုဝင်စီးရတဲ့ အကြီးဆုံးအကြောင်းရင်းဟာ အမေရိကန်နိုင်ငံရေးမှာ အကြီးအကျယ်ပေါက်မဲ့ကိစ္စဖြစ်တာကို မီဒီယာတွေက သဘောမပေါက်နေကြဘူးလို့ တနင်္လာနေ့က တွိသွားပါတယ်။ သူပြောချင်တာက ကလပ်စီဖိုင်းမက်တီးရီးရလ်တွေကို ယူသွားခဲ့တာ ပြစ်မှုထင်ရှားရင် ငွေဒဏ်၊ ထောင်ဒဏ်အပြင် ရာထူးကနှုတ်ထွက်ရမယ်၊ အမေရိကန်ဥပဒေအရ ဘယ်လိုရာထူးမှ ယူလို့ မရစေရဆိုတဲ့ ကုဒ်ကို ညွှန်းထားတာဖြစ်ပါတယ်။ 

အဲဒါကို ကြည့်ခြင်းအားဖြင့် ထရမ့်ကို သူတို့စွပ်စွဲနေတာတွေ များပြားသလောက် တကယ်တမ်း ပြစ်ချက်တင်လို့ရတာ လက်ဆုပ်လက်ကိုင်ပြလို့ရတာ ဘာဆို ဘာမှမရှိတာ ထင်ရှားနေပါတယ်။

ဒါပေမဲ့ သမ္မတထရမ့် ယူဆောင်သွားခဲ့တာက ကမ္ဘာ့ခေါင်းဆောင်တွေက သူ့ကိုပေးတဲ့ စာတွေကို အမှတ်တရအနေနဲ့ ယူသွားတာဖြစ်ပြီး ဘာလုံခြုံရေးလျို့ဝှက်ချက်မှ မပါလို့လည်း ပေါ်ပေါ်ထင်ထင်သယ်ဆောင်သွားပြီး သူ့အိမ်အောက်ထပ်မှာပဲ ထားထားတာဖြစ်ပါတယ်။ တကယ်လို့ ဒီစာတွေက သူ့မှာသိမ်းပိုင်ခွင့်မရှိဘူး၊ နေရှင်နယ်အာခိုက်ဖ်ကို ပို့မှရမယ်ဆိုရင်လည်း ပို့ပါမယ့်အကြောင်း ထရမ့်ရှေ့နေကတဆင့် အက်ဖ်ဘီအိုင်တို့ နေရှင်နယ်အာခိုက်ဖ်တို့ကို ပြောထားပြီးသား ဖြစ်ပါတယ်။

နောက်အရေးကြီးတဲ့အချက်က အခြေခံဥပဒေကသာ သမ္မတဖြစ်ဖို့ အရည်အချင်းတွေ သတ်မှတ်ထားတာဖြစ်ပြီး တခြားဥပဒေတွေက အဲဒီအချက်ကို လွှမ်းမိုးခွင့် မရှိပါဘူး။ အမေရိကန်အခြေခံဥပဒေမှာ သမ္မတအရွေးခံမယ့်သူဟာ အသက် ၃၅နှစ်ပြည့်ပြီးဖြစ်ရမယ်၊ အမေရိကန်နိုင်ငံသားအဖြစ် မွေးဖွားလာရမယ်လို့ပဲ သတ်မှတ်ထားပါတယ်။

ငါးမရလည်း ရေချိုးပြန်မယ့် ဒီမိုကရက်တွေကတော့ သူတို့အကြံမအောင်လည်း ထရမ့်ဘက်က မခံမရပ်နိုင်သူတွေ ဆန္ဒပြကြ၊ ဆူပူကြမယ်ဆိုရင် အဲဒါကို အကြောင်းပြပြီး ရီပါဘလစ်ကန်တွေကို နည်းမျိုးစုံနဲ့ ကြပ်ကြဦးမှာပါ။ ဒါပေမဲ့ ထရမ့်ထောက်ခံသူတွေရဲ့ ဒေါသက အလှူငွေတွေအဖြစ်ကို ပြောင်းလဲပြီး ၂၄နာရီအတွင်း ခေတ်သစ်သမိုင်းမှာတခါမှ မရှိဘူးတဲ့စံချိန်တွေကို ရောက်ရှိသွားပါတယ်။ 

စင်စင်နာ့တီက အက်ဖ်ဘီအိုင်ရုံးကို ဝင်ရောက်ဖို့ ကြိုးစားခဲ့တဲ့ လက်နက်ကိုင်ရစ်ကီရှစ်ဖာကိုတော့ ရဲတွေက နေရာမှာတင် ပစ်သတ်ခဲ့ပါတယ်။ ၂၀၁၇က ထရမ့်ခန့်ထားခဲ့တဲ့ အက်ဖ်ဘီအိုင်ဒါရိုက်တာ ခရစ်စတိုဖာဝရေးက သူ့အပေါ်နဲ့ အက်ဖ်ဘီအိုင်အပေါ် ခြိမ်းခြောက်မှုများကို စိတ်ပျက်ဖွယ်ရာ အန္တရာယ်များအဖြစ် ဝေဖန်သွားပါတယ်။ တကယ်တမ်းပြောရရင် အပုပ်နဲ့ ထောင်းထောင်းထနေတဲ့ ကလင်တန်တို့ ဘိုင်ဒန်တို့ ပလိုးစီတို့ကို လူအင်အားနဲ့ သွားရောက်စစ်ဆေးဖို့ထားလို့ စစ်ဖို့ စကားဦးတောင် မသန်းခဲ့တာကမှ ပိုစိတ်ပျက်ဖွယ် ကောင်းတယ်လို့ ထင်ပါတယ်။

Tin Omma Myo